الأهلي في دوامة الخذلان: إدارة تتخبط، لاعبين بلا شرف، وإعلام يهاجم الجمهور!
اعداد: عزت مجدي
الأهلي النهاردة مش الأهلي اللي عرفناه وافتخرنا بيه طول عمرنا. إدارة نايمة في العسل، 18 يوم عدّوا بدون صفقة واحدة تسد العجز اللي في الفريق، وكأنهم مستنيين كارثة جديدة تضربنا بعد فضيحة صن داونز اللي كسرت قلوب الملايين.
الهزيمة مش بس في الملعب، الهزيمة الحقيقية إن جمهور الأهلي بقى بيتهاجم بدل ما يتسمع! إعلام النادي الرسمي اللي المفروض يكون صوت الجمهور، بقى منصة لتبرير الفشل ومهاجمة اللي بيحاولوا يقولوا الحقيقة. بدال ما ندور على حلول ونواجه الأزمة، الإدارة وجيش اللجان بتدافع عن الأخطاء وكأنهم عايشين في كوكب تاني.
فين الاحترافية اللي بتتكلموا عنها؟ فين الخطة اللي المفروض تنقذ الفريق؟ ولا إحنا بقينا نادي قرارات فردية وتبريرات سخيفة؟ محمود الخطيب، اللي اسمه مكتوب بحروف من ذهب كلاعب، أثبت إنه مش قادر يدير الأهلي كإدارة. الكيان اللي كان بيضرب بيه المثل في الإدارة بقى في حالة تخبط مش طبيعي.
أما اللاعبين، فحدث ولا حرج. موظفين بياخدوا الملايين عشان يتمشوا في الملعب. تيشيرت الأهلي اللي كان بيبكي عليه الأساطير لو خسروا ماتش، بقى النهاردة مجرد قميص لأي حد يلبسه عشان ياخد كام مليون في السنة. فين الرجولة؟ فين القتال؟ فين روح الأهلي؟
والأدهى، بدل ما الإدارة تواجه الجمهور وتسمع غضبه، لجان إلكترونية وإعلام النادي مشغولين يهاجموا الجمهور ويطلبوا منه السكوت. جمهور الأهلي اللي وقف مع الفريق في أصعب الظروف، بقى متهم إنه ضد مصلحة النادي!
يا إدارة الأهلي، لو مش قادرين تتحملوا الضغط وتلاقوا حلول، اتفضلوا سيبوا الكراسي لحد عنده الشجاعة والمسؤولية. الأهلي مش عزبة ولا منصب للوجاهة الاجتماعية. الأهلي كيان كبير، وجمهوره مش هيقبل استمرار المهزلة دي أكتر من كده.
#الروحقبلكل_شيء
#لالتكميمالأفواه
#الأهليكيانمش_كرسي
