عزة لبيب لـ “المصور”: ليست كل المسلسلات ناجحة، قوة الفكرة وسرعة الأحداث هما الأساس
حوار أحمد سالم
من خشبة المسرح إلى شاشة التلفزيون، ومن الكوميديا إلى الأدوار الجادة، صنعت الفنانة عزة لبيب لنفسها مكانة مميزة في عالم الفن المصري، في حوار شيق مع موقع المصور، كشفت لنا كيف ترى المنصات وتأثيرها على صناعة الدراما المصرية وتوقعاتها لمستقبل الدراما في المنطقة وأعمالها الجديدة ومفاجآت للجمهور.
كيف ترى تأثير المنصات مثل “Watch it” و”شاهد” و”Yango Play” على صناعة الدراما في مصر والعالم العربي؟
تأثيرها كويس جدًا، سمحت أن يحصل إنتاج كثير أكثر من العادى، وبينت إن المسلسلات 7 حلقات و10 حلقات و15 حلقة، فأعطت فرصه كبيرة لإنتاج مسلسلات أكثر، وأنا شايفه أنها حاجه صحية جدًا للإنتاج الفنى.
هل تجدِ أن هذه المنصات تمنح الفنانين فرصًا أكبر للظهور والوصول إلى جمهور أوسع؟
المنصات طبعًا مديه فرصة أكثر لظهور فنانين والناس ابتدت تتفرج عليهم أكثر، فالمنصات دى أدت فرصة لمجموعة كبيرة من الشباب وكل الأجيال ابتدت تشتغل كويس فى المنصات دى عشان الإنتاج كثير، وحلو اوى أن هو طول السنة مش متحدد على يعنى شهر معين.
في رأيكِ، هل المنصات الرقمية هي مستقبل صناعة الترفيه في المنطقة أم لا تزال التلفزيونات التقليدية لها دور كبير؟
طبعًا ليها مستقبل كبير جدًا، احنا بنتطور فى التكنولوجيا وفى الحاجات السريعة ومش ملاحقين لكن سيظل التلفزيون التقليدى ليه دور كبير جدًا ليه متعة في المشاهدة أكثر من أي حاجة تانية.
في رأيكِ، هل تكون المسلسلات القصيرة أكثر قدرة على جذب الجمهور نظرًا لقوة الفكرة وسرعة تطور الأحداث؟
مش شرط ساعات القصيرة مبتبقاش فكرتها قوية ومفيش احداث سريعة وساعات المسلسل الطويلة بتبقى 100 حلقة والناس بتتفرج عليها من غير أى ملل ما دام الأحداث كويسة والأحداث سريعة مفيهاش تطويل، مفيهاش إعادة أحداث يبقي يتفرجوا عليها طبعًا.
هل تعتقدِ أن المسلسلات الطويلة ما زالت قادرة على المنافسة مع المسلسلات القصيرة على المنصات؟
طبعًا، أنا شايفه إنه فى مسلسلات طويلة تقدر تنافس المسلسلات القصيرة على المنصات، هى الفكره في سرعة الأحداث.
كيف ترى تجربة عرض المسلسلات خارج موسم رمضان وهل تعتقدِ أن هذه الظاهرة بدأت تأخذ مكانها في الصناعة؟
طبعًا، خف الضغط على مسلسلات رمضان بكميات كبيره أنها تنتج كميات مسلسلات كثيرة نازلة في رمضان، لكن لو الفنان مش متواجد في رمضان فأتيح له الفرصة المشاركة طول السنة في هي ظاهره كويسة جدًا وخدت مكانها فى الصناعة.
هل تجدِ أن المنصات الرقمية قد ساعدت في تطوير الصناعة بشكل عام، بما في ذلك النصوص والأداء والإنتاج؟
طبعًا ساعدت كثير جدًا، وابتدينا نشاهد نصوص جديدة، والأداء بيبقي فيه تطور، والإنتاج تطور جدًا، والتصوير بقى أفضل.
ما هي توقعاتك لمستقبل الدراما في المنطقة، خاصة مع تزايد الاهتمام بالمنصات الرقمية؟
المستقبل كويس جدًا وبيتطور مع مرور الوقت، احنا متواجدين بقوة في المنطقة العربية والمنصات الرقمية ودي حاجه نفتخر بيها جدًا.
هل لديكِ أعمال جديدة تحضر لها في الوقت الحالي وهل هناك أي مفاجآت تنتظر جمهورك في الفترة القادمة؟
أنا ليا مسلسلين لسه منزلوش مسلسل 10 حلقات، ومسلسل 15 حلقة يبقوا على المنصات، وپإذن الله لما ينزلوا يعجبوا الناس، وأنا لحد دلوقتي معنديش حاجه في رمضان واحتمال يكون عندي مسرحية جديدة پإذن الله بس لسه بقرأ الورق وبشوف ارجع مسرح الطفل.
