نورهان منصور لـ«المصور»: نفسي أقدم عمل عن “حياة التوأم واللخبطة اللي بتعيش جوانا”
حوار أحمد سالم
في عالم الفن، يمكن أن تشابه الوجوه يلفت الانتباه، لكن ما وراء العيون دائمًا حكاية مختلفة.
نورهان منصور، واحدة من موهبتين تسكنان ملامح متطابقة، لكن لكل منهما صوتها الخاص، ورؤيتها الفنية المتفردة.
في هذا الحوار مع المصور، تفتح نورهان قلبها، وتحكي عن علاقتها بتوأمها الفنانة رانيا منصور، وعن المواقف الطريفة اللي بتحصل بسبب الشبه، و”اللغبطة” اللي بتخلقها الحياة قبل الكواليس.
تتحدث نورهان عن التمثيل كطريق اكتشفته بروحها قبل عقلها، وتحكي عن الأدوار اللي بتحلم بها، من البنت الشعبية إلى الخيال العلمي، مرورًا بمشهد قديم لسه ساكن في وجدانها.
وكان لموقع المصور حوار خاص مع الفنانة نورهان منصور :
لما بتقري سيناريو، إيه اللي بيلفتك أولاً: الشخصية؟ ولا القصة؟ ولا المخرج؟
كل دول مع بعض، كل العناصر دي مهمة جدًا، مفيش عنصر أقل أهمية عن التاني، لكن كمان ممكن أميل لسيناريو قوي ومخرج مهم، لأنهم في نظري أهم عنصرين لنجاح أي عمل فني.
هل حصل لخبطة في كواليس عمل فني بسبب التشابه بينك وبين رانيا؟
اللغبطة بتحصل في الحياة بشكل عام، طول الوقت الناس بتتلخبط ما بينا، لكن كواليس الأعمال الفنية من البداية، الكرو كله بيبقى عارف مين فينا اللي مشارك في العمل، بس أوقات بروح أزور رانيا مثلًا في لوكيشن تصوير، فالناس في اللوكيشن بيفكروني وأنا داخلة إني رانيا، فالموضوع بيضحك قوي.
ومرة زُرت رانيا في تصوير مسلسل الخلطة السحرية، ودخلت اللوكيشن، و رانيا كانت لسة بتلبس، فالمخرج قالي: “يلا يا رانيا علشان نبدأ، إنتِ واقفة كده ليه؟ فطبعًا كان ضحك لما عرف إني مش رانيا.
لو عمل فني جمع بينك وبين رانيا في بطولة مزدوجة، تحبي يكون بيكلم عن إيه؟
نفسي قوي في عمل يبقى بيتكلم عن حياة التوأم، والتركيبة النفسية اللي بتوصف علاقة التوأم ببعض، والأثر النفسي الناتج عن تعاملهم مع الناس، واللخبطة اللي بتحصل نتيجة للشبه.
فيه فرق بين نورهان قدام الكاميرا ونورهان في الحقيقة؟ وإيه أكتر فرق واضح؟
نورهان قدام الكاميرا بتقوم بدور نورهان الممثلة اللي بتجسد شخصيات مختلفة، نورهان في الحقيقة بسيطة جدًا وعلى سجيتها أكتر.
بتقابلي صعوبة إنك تفصلي بين شخصيتك الحقيقية والدور اللي بتمثليه؟ خصوصًا لو كان شخصية درامية أو حزينة؟
بواجه صعوبة أكيد، لكن كمان اتعلمت طرق تخليني أقدر أفصل، ليها علاقة بعلم النفس،
وفي العموم أنا بشوف إن دراسة علم النفس مهمة جدًا لأي ممثل.
هل في مشهد نفسك يتعاد؟ لأنه لمسك أوي وكنتي عايزة تعيشيه تاني؟
آه، فيه مشاهد كتير من مسلسل نصيبي وقسمتك أحب أعيدها تاني، لأنها كانت مشاهد عميقة قوي، أحب أعيدها لأني هبقى مستمتعة بإعادة تجسيدها تاني.
فيه مشهد نفسك تمثليه في حياتك، بس مش لاقيه لسه الورق المناسب؟
آه طبعًا، في مشاهد كتير، أنا نفسي قوي أجسد مشهد لبنت شعبية مثلًا، ونفسي كمان أجسد أدوار ليها علاقة بجونر الخيال العلمي، لأني بحب الجونر ده جدًا.
لو قدرتي تمثلي فيلم قصير عن رحلتك الفنية… تسميه إيه؟
أسميه الأحلام الممكنة.
شايفة إن الأدوار الصغيرة أوقات بتقول عن الممثل أكتر من البطولة؟
الأدوار الصغيرة بتأثر في أحداث أي عمل، لكن البطولة طبعًا بتكون هي المساحة الأكبر اللي بتبرز إمكانيات الممثل بوضوح.
من الفنانين الشباب، من ترى أنهم يشكلون مستقبل الدراما في مصر؟
كتير، بشوف أحمد غزي، عصام عمر، أحمد مالك، طه دسوقي، وكتير غيرهم.
وبالنسبة للبنات، بشوف توانا طبعًا، ياسمين العبد.
كيف ترى تأثير السوشيال ميديا على الفن والدراما؟
السوشيال ميديا عندها القدرة لعرض مواهب كتير، وكمان هي عندها القوة في صناعة النجم.
هل تفكرين في خوض تجربة الإنتاج أو الإخراج يومًا ما؟
أنا اشتغلت في الإنتاج كتير قبل ما أمثل، وعندي خبرة كويسة، أعتقد أقدر أنتج في يوم من الأيام وقت ما أكون جاهزة لده،
أما بالنسبة للإخراج، فهو مسؤولية كبيرة جدًا، أتصور محتاج دراسة قبل ما أفكر في الخطوة دي.
لو رجعنا لأول يوم وقفتي فيه قدام الكاميرا… تقولي لنفسك إيه دلوقتي؟
أقولها اثبتي، إنتِ موهوبة، وربنا حطك في المكان ده لحكمة معينة.
هل التمثيل كان حلم واضح من الأول؟ ولا جالك صدفة؟
لا، التمثيل مكنش حلم واضح بالنسبالي، لكن أنا طول عمري عندي ميول فنية ليها علاقة بالرسم والرقص والغنا، فكان التمثيل التطور الطبيعي.
في ناس تعرفك من أعمالك، وناس من السوشيال… بتحبي الناس تشوفك إزاي؟ ممثلة؟ شخصية عامة؟
لا، أحب الناس تشوفني ممثلة أكيد.
لو اتعرض عليكي دور في عمل تاريخي… نفسك تبقي مين؟ وإيه اللي شدك فيها؟
أحب أجسد الأدوار التاريخية بشكل عام، لأنها ممتعة جدًا،
بحب الحقبة الفرعونية جدًا، وبحب زمن الخمسينات.
إيه أول حاجة تقوليها لأي شاب أو بنت حابين يدخلوا التمثيل؟
أحب أقولهم ركزوا وآمنوا بموهبتكم جدًا.
لو هتسيبي رسالة لجيل جديد لسه بيبدأ… تكتبي لهم إيه؟
لو ربنا وهب ليكوا موهبة، ده معناه إنه عايزكوا تشتغلوا عليها وتصدقوها، ومفيش حلم مستحيل، الأحلام كلها ممكنة.
