جنا صلاح لـ “المصور” : المحلل مش مجرد توقيع .. كيف غيرت ‘قلبي ومفتاحه’ نظرة المجتمع للطلاق؟
حوار أحمد سالم
الفنانة جنا صلاح، واحدة من الوجوه الشابة الواعدة في عالم الدراما المصرية، استطاعت أن تفرض نفسها بقوة من خلال أدائها المتميز وقدرتها على تجسيد الشخصيات المعقدة ببراعة، بدأت مشوارها الفني بخطوات واثقة، وشاركت في عدد من الأعمال الدرامية التي لاقت صدى كبيرًا لدى الجمهور، مما جعلها اسمًا لامعًا في سماء الفن.
جنا صلاح ليست مجرد ممثلة، بل هي فنانة تحمل رسالة، وتسعى دائمًا لاختيار أدوار تعكس قضايا مجتمعية مهمة، مما يجعل أعمالها قريبة من واقع المشاهدين، بجانب موهبتها التمثيلية، تتمتع جنا بشخصية جذابة وطاقة إيجابية تجعلها محبوبة من الجمهور وزملائها في الوسط الفني.
في هذا الحوار تكشف جنا صلاح أسرار مشوارها الفني، وتفاصيل تجسيدها لشخصية “شروق”، وكيف استطاعت أن تقدم قضية اجتماعية حساسة مثل الطلاق والزواج الثاني بمنظور جديد ومختلف، تشاركنا أيضًا رأيها في تطور الدراما المصرية، وما الذي تطمح إليه في المستقبل.
المسلسل يتناول فكرة “المُحلل” بطريقة درامية، ما الذي يميز “قلبي ومفتاحه” عن الأعمال التي تناولت قضايا الزواج والطلاق من قبل؟
أنا شايفة أن المسلسل ده مختلف تمامًا عن المسلسلات الماضية، هو مش بس جايب القضية وبيعرضها، هو كمان بيقولك إيه المشاكل اللي بتبقى في خيال الناس اللي بتقع فيها دائمًا، زي مثلاً فكرة المحلل، دائمًا زي ما أسعد عمل، جاب رجل كبير ويمضيه على ورقة طلاق وشكرًا، المحلل مش كده، مش واحد يمضي على ورقة، وفي مشهد مهم جدًا أستاذ تامر عمله إن شرعًا لازم الزوجة ميكونش في نيتها أنها تطلق من الزوج الثاني ويكون وسيلة لرجوعها لزوجها الأول، إحنا مش نتحايل على الشرع، فالمسلسل بيجيب المشكلة وبيجيب الحل الصحيح مش الحل المتداول، ويخليك تشوف كمان إن كلمة الطلاق دي مش هينة، وليه ربنا حرم إن الزوجين يرجعوا لبعض بعد الطلقة الثالثة، وإن لازم العلاقة بين الزوجين مبنية على مودة ورحمة، لما بنشوف ميار وعزت مع بعض، على عكس ما بنشوف ميار وأسعد مع بعض، بنشوف هناك علاقات مختلفة تمامًا، المسلسل ده معمول بكل بساطة بكل حب، وكان فيه مجهود كبير لأن موضوع سلس موضوع طويل، وهو ده اللي بيحصل إننا لما بنتفرج على المسلسل مبتحسش أبدًا إنه بعيد عنك، لأن دي كلها أحداث بتحصل على أرض الواقع وبتحصل في بيوت كثيرة جدًا، وحقيقي المسلسل قدر يبين إن القضية دي مهمة جدًا ومش قضية بسيطة.
هل تعتقد أن قصة المسلسل تعكس واقعًا يحدث بالفعل في مجتمعاتنا؟
طبعًا قصة المسلسل بتحكي واقع بيحصل في مجتمعنا دائمًا، وكلنا تقريبًا شفنا حالات شبه كده كثير، وأنا شخصيًا شفت حالات شبه كده وشفت قضايا شبه كده، واتنين متجوزين مش عارفين يرجعوا لبعض، المسلسل حقيقي جدًا، مش مسلسل معمول مجرد في رمضان وخلاص، هو مسلسل يناقش قضية، وكمان دخل جوه أعماق الشخصيات بكل دوافعها.
ما الرسالة الأساسية التي يحاول المسلسل إيصالها للجمهور؟
هي فكرة إن الطلاق معتقدش إنه بالسهولة دي، وعمره ما يكون حل للمشاكل، بل بالعكس ممكن يوصل الطرفين لطريق مسدود، وأي علاقة بين زوج وزوجة لازم تكون مبنية على احترام وحب، وكمان فكرة المحلل، المسلسل وصلها بعكس ما ناس كثير كانت فاهمة، فكرة إن المحلل دي ليها شروط، ولازم توافق ما بين الطرفين، ولازم يكون الزوجة داخلة العلاقة الزوجية مش ناوية تتطلق وتتحايل على الشرع، وكلمة الطلاق دي متكونش هينة كمان، الاحترام ما بين الزوج والزوجة والتفاهم مهم جدًا، والفرق بين عزت وأسعد في تعامل مع ميار أعتقد أن المسلسل وضحه بشكل كويس جدًا جدًا، ومشهد الأكل اللي ما بين أسعد وميار في المطعم لما قالتله “انت مسألتنيش تأكلي إيه”، فرق شاسع بين أسعد وعزت، عشان كده ميار جت في أواخر الحلقات اللي هي خلاص عايزة تبقى مع عزت، شافت نفسها ست مع عزت.
كيف تعامل فريق الكتابة مع هذه الفكرة لضمان تقديمها بشكل درامي مشوق وغير تقليدي؟
الأستاذ تامر محسن والأستاذة مها الوزير طبعًا قدموا الموضوع بشكل غير تقليدي، اهتموا بتفاصيل الشخصيات أوي، اهتموا بتفاصيل الشخصيات جدًا، واهتموا بتفاصيل مهمة جدًا، وكل حاجة عن علم ودراية، المسلسل مش مكتوب وخلاص، احنا مش بنعمل عمل درامي في رمضان وخلاص، احنا بنقدم فعلا قضية، وأنا دائمًا بشوف من أستاذ تامر وأستاذة مها إن هو ده الحل، أقدملك موضوع وأفيدك كمشاهد، إني أقدملك قضية بشكلها الحقيقي والمختلف، وأكون مذاكرها كويس أوي عشان توصلك بالشكل ده.
هل كان هناك تحديات في تقديم هذه القضية دون إثارة الجدل أو المساس بحساسية بعض الفئات من الجمهور؟
أنا معتقدش إن القضية تسبب إثارة جدل أو حساسية لبعض الفئات، بالعكس دي قضية مهمة جدًا خصوصًا إنها موجودة بشكل كبير أوي في مجتمعنا.
ما الصعوبات التي واجهتيها أثناء تجسيد هذا الدور؟
الحمد لله مفيش صعوبات واجهتها في الدور، أنا بالعكس حبيت الشخصية جدًا، ولما قعدت مع أستاذ تامر محسن وشرحلي الموضوع، أنا حبيت الشخصية أوي، معناها مختلفة عني تمامًا، بس حقيقي شخصية طمعتني فيها، نوعية الدور خلتني أفكر إني ازاي أذاكر الشخصية وتتقدم بشكل مختلف.
هل ترى أن شخصية المرأة المطلقة في المسلسل تمثل شريحة كبيرة من النساء في المجتمع؟
طبعًا شخصية المرأة المطلقة بتمثل فئة كبيرة في المجتمع، وموجودة بشكل كبير، وكمان شخصية ميار في المسلسل كمان شارط عليها يا ترجعلي يا ما تشوفي ابنك، فالست محطوطة في وضع ضعيف جدًا، ولا منها عارفة تعيش حياتها.
هل هناك مشاهد معينة كانت الأكثر تأثيرًا بالنسبة لك أثناء التصوير؟
بالنسبة للمشاهد أثناء التصوير، أنا بحب مشاهد شروق جدًا، أنا حبيت الشخصية بغض النظر إن شروق خانت جوزها، وشروق عندها مشاكل، بس أنا كممثلة حبيت الشخصية جدًا، الحمد لله وكل المشاهد في المسلسل، وكمان مشاهد شروق مكتوبة كويس جدًا. فعايزة أقولك قبل أي تصوير دائمًا أستاذ تامر بيقعد معايا وبيفهمني ويقولي عايزين نوصل إيه من المشهد، وحاسة بإيه، والحمد لله المشاهد كلها بالنسبالي حلوة، ومعنديش مشهد أقل من مشهد، والمشاهد كلها بتوصل المراد اللي مفروض يوصل للناس.
كيف كانت أجواء العمل مع فريق التمثيل والإخراج؟
دياب ممثل جميل أوي وإنسان محترم، وأنا سعيدة ومبسوطة إني اشتغلت معاه، وطاقته الجميلة جدًا، والحمد لله كنت مرتاحة، وبالنسبة للإخراج، في الأستاذ تامر محسن فرصة كبيرة جدًا جدًا لأي ممثل يشتغل معاه، وأنا أول ما جالي الفرصة دي اتبسطت جدًا لأن أستاذ تامر من أهم المخرجين الموجودين، وحقيقي إضافة لأي ممثل.
كيف ساهم المخرج في إبراز تفاصيل الشخصيات بشكل مميز؟
أستاذ تامر محسن بيهتم أوي بالممثل ونفسية الممثل، بيحاول يطلع إن اللي قدامه أحسن من اللي عنده، مش بس أنا بخرج عمل، عشان كده دائمًا بتلاقي أستاذ تامر مميز في أعماله، لأنه بيعرف ازاي يتعامل مع شخصية اللي قدامه، وكمان بيحاول يوصلك المعلومة من خلال تفاصيله، وشايف نفسه كممثل قبل التصوير، وقبل التصوير كان بيقعد معانا ويقولنا المفروض شروق تعمل إيه، فقد إيه الموضوع ده مهم جدًا.
كيف كان رد فعل الجمهور على المسلسل حتى الآن؟
الحمد لله المسلسل اتشاف كويس جدًا، والناس اتفاعلت مع الممثلين بشكل كويس جدًا.
هل توقعت أن يثير المسلسل نقاشًا واسعًا حول قضية الزواج الثاني والمُحلل؟
فكرة المسلسل عشان الموضوع اجتماعي وحقيقي، فأتوقع يكون فيه نقاش واسع أكيد، لأن الموضوع مش تقليدي، الموضوع حقيقي أوي، وكل ما الحاجة تكون حقيقية، كل ما قربت للناس أوي.
هل تلقيتِ أي تعليقات أو رسائل من الجمهور حول الشخصية التي تقدميها؟
طبعًا الناس دلوقتي شايفاني خاينة وشريرة ووحشة، وإن أنا خنت أسعد، ولما رحت واجهت الفنانة مي عز الدين، وقلتلها إن أنا متجوزة، شفت كومنتات ناس كثيرة كانت عايزة ترميني من على السلم، وضايقوا مني أوي، شايفاني شريرة وقاسية.
هل تعتقد أن المسلسل سيساهم في تغيير نظرة المجتمع لهذه القضايا؟
أعتقد أن المسلسل ممكن يكون على أقل تقدير وضح حقيقة المحلل، وإن الموضوع بيتاخد بشكل صحيح ومش بالبساطة زي ما الناس متخيلة، فأعتقد يساهم في تغيير نظرة المجتمع طبعًا.
هل هناك مشاهد معينة أثارت جدلًا بين الجمهور أو كانت محط نقاش واسع؟
في مشاهد كتير أثارت جدل في المسلسل، المشهد اللي دياب شاف في مراته إنها متجوزة حد تاني، كانت صدمة لدياب، المشهد اللي أنا واجهت فيه مي عز الدين إن أنا متجوزة، وطبعًا شفت كومنتات كتير ناس عايزة تعرف يعمل إيه بعد الخيانة، حاجات كتير في المسلسل، وفي مشاهد الناس اتبسطت منها جدًا، فالمسلسل مليان مشاهد كتير حقيقة، كلها محطات نقاش واسع.
ما نوع الأدوار التي ترغبِ في تقديمها في المستقبل؟
أنا بحب اشتغل كل الأدوار، وكل حاجة مختلفة عني، “قلبي ومفتاحه” مش أول تجربة ليا، قدمت حاجات كتير شبهي وحاجات مختلفة عني، شروق مختلفة عني 180 درجة، دي أكثر حاجة حببتني في الدور، وأنا بحب أوي أقدم أدوار مختلفة، وأنا كممثلة أحب أقدم أدوار مختلفة.
هل تفضلِ الأعمال الاجتماعية التي تناقش قضايا مجتمعية مثل هذا المسلسل، أم تميل أكثر إلى الأكشن أو الكوميديا؟
أنا كممثلة بحب اشتغل كل حاجة، بحب اشتغل قضايا اجتماعية مختلفة، بحب اشتغل كوميدي، وأنا كممثلة بحب دائمًا أذاكر وأتطور من نفسي، وأعمل كل حاجة مختلفة.
هل لديكِ حلم بتمثيل نوع معين من الشخصيات لم تحصل على فرصة تقديمه بعد؟
أنا طبعًا بحلم إني أمثل أنواع مختلفة من الأدوار، أنا بحب أعمل كل حاجة، بحب أعمل كل الشخصيات، بحب أوي مذاكرة التمثيل لأني بحبه، واتمنى يكون عندي فرص كويسة تخليني أقدم شخصيات مختلفة.
كيف ترى تطور الدراما المصرية والعربية في تناول الموضوعات الاجتماعية الحساسة؟
أنا مبسوطة جدًا إن الدراما المصرية والعربية بقت مركزة جدًا على موضوعات اجتماعية حساسة، لأن ده اللي مجتمع محتاج يفهمه، موضوعات كتير أوي مش مطروحة، وفكرة إن الدراما تساهم في طرح موضوعات مهمة في الحقيقة ده شيء مهم جدًا، واتمنى إن الدراما دائمًا تقدم موضوعات تفيد المجتمع.
