دنيا عبد العزيز لـ “المصور” : استمرارية ‘المداح’ بأجزائه دليل على نجاحه وتفرده في الدراما المصرية
حوار أحمد سالم
الفنانة المبدعة دنيا عبد العزيز، التي بدأت مسيرتها الفنية منذ الطفولة، واستطاعت بموهبتها الفذة أن تحجز مكانة خاصة في قلوب المشاهدين من خلال العديد من أعمالها ومنها مشاركتها في مسلسل “المداح”، الذي حقق نجاحًا كبيرًا في الدراما المصرية والتي أثبتت قدرتها على تقديم أدوار متنوعة ومميزة في الدراما المصرية، في هذا الحوار سنتناول عن أهمية مسلسل “المداح” في الدراما المصرية، ورؤيتها لاستمراريته في تقديم أجزاء جديدة، بالإضافة إلى رؤيتها المنصات الرقمية والمسلسلات خارج موسم رمضان.
ما هي أهمية مسلسل المداح في الدراما المصرية وكيف ترين استمراريته في تقديم أجزاء جديدة؟
هو أي مسلسل بيتقدم منه أجزاء ده دليل على نجاح المسلسل، وأهمية المداح إنه عمل مختلف ومميز وموضوع وحدوتة مختلفة خالص الناس حبتها وشافت إنه مالوش علاقة بأي أعمال أخرى، وفي حته لوحده، واستمراريته وتقديم الأجزاء دي ده دليل على نجاحه.
ما هي أبرز ما ميز هذا الجزء عن الأجزاء السابقة من وجهة نظرك؟
لا هو كل جزء فيه ما يميزه، كل جزء ليه توليفة مختلفة وتركيبة مختلفة وكاست جديد غير الأبطال الرئيسيين، كل جزء ليه طعم خاص بيه ومتنوع ومتجدد وفيه فكرة جديدة، فكل جزء في حاجة بتميزه عن الجزء التاني.
هل تتوقعين أن يحقق هذا الجزء نجاحًا كبيرًا مثل الأجزاء السابقة ولماذا؟
أنا عمري ما بتوقع حاجة، أنا بسيب ده لربنا، إحنا بنعمل اللي علينا وبنخلص جداً في عملنا وبنركز وبنذاكر وبنعمل أهم ما ممكن نعمله والباقي والنجاح ده بتاع ربنا.
هل تجد أن هذه المنصات تمنح الفنانين فرصًا أكبر للظهور والوصول إلى جمهور أوسع؟
طبعاً المنصات أدت فرص كبيرة للفنانين إنهم يشتغلوا أكتر لأن بقى فيه جهات متنوعة من الإنتاج وشركات كتيرة من الإنتاج بتعرض شغلها في منصات كتيرة ده أولاً، ثانيًا إن الجمهور بشكل أوسع بقى بيشوف كل القنوات فبقى عندك شريحة جمهور أكبر وأكبر ولكن ده مبيلغيش خالص أهمية التلفزيون لإن إحنا عندنا شريحة من المجتمع اللي هما الكبار في السن دول متمسكين بكل اللي بيحبوه زمان اللي متعودين عليه واللي معندهمش استعداد يغيروه إنهم يفتحوا قنوات التلفزيون العادية اللي هما متعودين عليها، وممكن ميبقاش عنده المنصات، المنصات وجودها حافز كبير لينا إن إحنا نشتغل وإنها عملت توسع جامد جداً لكن مينفعش أبداً ألغي فكرة التلفزيون لأن فيه شريحة مهمة جداً مكملة على الاستايل بتاعها.
ما هي المزايا التي تجديها في العمل مع هذه المنصات مقارنة بالقنوات التقليدية؟
الميزة إن ناس كتيرة أوي والموضوع بقى زي موضة فالناس خلاص بقى عندها المنصات دي فبيتفرجوا أكثر، فبقى فيه حجم كبير جداً وناس كثيرة جداً بتتفرج عليك وحابه إنها تتفرج عليك خصوصاً في الأعمال اللي هي بتبقى 10 حلقات و15 حلقة والكلام ده، والناس بقت شايفة إن ده على المنصات بيبقى موجود أكتر في بيتفرجوا على الحاجات دي أكثر.
هل تفضلِ العمل في المسلسلات القصيرة أم الطويلة وما السبب وراء اختياركِ؟
أنا بفضل المسلسلات اللي دوري فيها مميز، بغض النظر قصيرة أو طويلة اللي بيفرق معايا الورق ودوري في العمل والعمل ككل عمل مهم وهادف ولا لا.
في رأيك، هل تكون المسلسلات القصيرة أكثر قدرة على جذب الجمهور نظرًا لقوة الفكرة وسرعة تطور الأحداث؟
والله الموضوع هو اللي بيفرق مش عدد حلقات المسلسل، اللي بيفرق الموضوع نفسه وإذا كان موضوع مهم والمخرج عمل عمل مميز واختار إنه يعمل عمل مميز ومختلف الناس هتجري وتشوفه وتحبه مالهاش علاقة إذا كان قصير أو طويل.
كيف ترى تجربة عرض المسلسلات خارج موسم رمضان وهل تعتقد أن هذه الظاهرة بدأت تأخذ مكانها في الصناعة؟
اه طبعًا المسلسلات خارج رمضان دي بقالها فترة، وأنا من أوائل الناس اللي بدأوا في الأعمال اللي خارج رمضان، وكان مسلسل الأب الروحي كان خارج رمضان واتعرض ونجح نجاح كبير جداً، وأنا بحب العمل ده، ومعنديش مشكلة في الأعمال اللي خارج رمضان بالعكس بتتشاف وبقت ناجحة هو الموضوع كله زي ما قولت الموضوع لو شد الناس خلاص المسلسل هينجح.
هل تفضل المشاركة في مسلسلات تعرض في رمضان أم خارج الموسم ولماذا؟
بفضل أشارك في المسلسل اللي الورق فيه حلو.
هل تعتقد أن المسلسلات خارج موسم رمضان تمنح فرصة أكبر للتجريب وابتكار أفكار جديدة؟
المسلسلات اللي في خارج رمضان أدت فرص للناس تشتغل أكثر طول السنة، وإن الجمهور يتفرج أكثر طول السنة، ميبقاش محصور في إنه مستني رمضان بس عشان يشوف مسلسلات رمضان هيبقى فيها أعمال مختلفة وجديدة لا بقى عندنا تنوع نتفرج طول السنة على أعمال، والفنانين برضو بقى عندهم قدرة يشتغلوا طول السنة مش محصورين في شهر واحد.
ما هي الرسالة التي تحبين أن توصلها من خلال أعمالك الفنية؟
الرسالة متبقاش رسالة واحدة، الرسالة إن الواحد يطلع بالعمل بإسمه الناس فاكراه وحافظاه وشايفين إنه قدم عمل راقي ومهم وأثر في وجدان المجتمع.
ما هي الأدوار التي تحلمين بتجسيدها في المستقبل؟
أنا بحب أقدم أدوار كتيرة جداً، وأنا طول الوقت كنت بحس إن أنا لسه مقدمتش أي حاجه من اللي نفسي أقدمها بالرغم من إن أنا بشتغل من وأنا عندي 10 سنين طول الوقت عندي شغف إني عايزة أقدم أعمال مهمة توصل لقلوب الناس وإن الناس طول الوقت تبقى شايفة العمل اللي أنا فيه وإن دوري مهم ومميز فأنا لسه قدامي حاجات كثيرة جداً.
